أنا كذّاب

الشاعر خليل روكز

أنا كذّاب أكذب من حرامي
وكلّ الكذب في حبّي وغرامي
وكل شي كنت إتغزل بحبك
ضميري ما تعرّف عا كلامي

أنا كذّاب يا حوّا لأنّي
تبعت عْواطفي وما تبعت ظنّي
صدق ظنّي غصب عنّك وعنّي
وعرف شو غايتك بالحبّ منّي
جفل وبعزّتي وعّى الكرامي

أنا كذّاب ما عندي محبّي
ولا مؤمن بحوّا صنع ربّي
لكن شفت عالغربال حبّه
انغشّيت وعليها بنيت قبّه
من شعري وخلودي وإحترامي

أنا كذّاب إنت مش نزيها
حبّه مفوّشي والسّوس فيها
النمل لو شافها ما بيشتهيها
وأنا من بعد ما البيدر نسيها
رجعت لميّتها بْجفن السّلامي

أنا كذّاب أصحى تصدّقيني
ما عندك قلب يستاهل حنيني
خمّنتك حمامه لهالسفيني
عرفت شو جنسك وْلا تواخذيني
من هالجنس ما بيخلق حمامي

أنا كذّاب ما بصدق بمرّه
ولأجل الإختبار صدقت مرّه
وقلت بلكي بلاقي ستّ حرّه
لقيت نهايتي بالحبّ مُرّه
قطعت الخيط خوف من النّدامي

أنا كذّاب والشّعر الكتبتو
كرامة غايتي لإسمك وهبتو
خدعت الخمر تا حنّ وشربتو
وساعة ما فضي الكاس وقلبتو
شرب عبسه وسقاني الإبتسامي

أنا كذّاب فيكي علقت مدّي
عملت حالي معي غيره ومودّي
قلتي عال صرتي تستبدّي
ولو ما يكون بعدو الشّطّ حدّي
كنت غرقت في بحر الملامي

أنا كذّاب ما صدقت بعهودي
ولا بحفظ ولا بوفي بوعودي
وإنتي بحيث بيضيمك وجودي
عودي لمعشر الأصنام عودي
وأنا برجع بفتّش عا مقامي

أنا كذّاب غشّيت الخليقه
وقلت عنّك ندي وإنتي حريقه
عرفتك عند ما عرفت الحقيقه
وقدر ما تكون أسرارك عميقه
الحرامي بيعرف سرار الحرامي