بحر بحور

إبراهيم شحرور

في بحر للصيّاد
ليل نْهار
بْيرمي الشبك
ويْعدّ سمكاتو
وْفي بحر
شمسو للمرا زنّار
وْتكرج عَ جسما
عيون موجاتو
وْفي بحر
خلف البحر
للبحّار
تارك بإيد الريح
مرساتو
وْفي بحر للغرقان
شطّو صار
حلم اللي ماتو
قبل ما ماتو
كلما رحت مشوار
عم بحتار
هالبحر
شو في بْحور
جوّاتو
يمكن أنا بْقلبي
قلوب كتار
كلْ قلب
بسمع شِكل
دقّاتو
وْما في وَلا مرّه
رحت مشوار
عالبحر ذاتو
بالقلب ذاتو