رئيس التحرير: إخلاص فرنسيس 
الملتقى
ماري القصّيفي
بعرف ما رح نلتقي، ولكن ما بعرف ليش عم ظبّط حالي، ليش ساويت شعري، ليش حطّيت ع ضفيري اللون يللي بتحبّو، ليش رشّيت نقطتين عطر مطرح ما بتحب تبوسني، ليش اخترت الفستان الصيفي يللي شفتني فيه أوّل مرّة مع إنو الطقس شتي وبرد
بعرف ما رح نلتقي، ولكن ما بعرف ليش حاسّة إنو إذا ما التقينا ما رح يلتقي ولا عاشقَين ع وج الأرض، وما رح يكبروا الولاد الزغار، وما رح يطلع الزهر بقلب قوي من دون ما يخاف من الصقيع والريح
بعرف ما رح نلتقي، ولكن ما بعرف ليش قاعدة قدّام المراية ت شوفك فيا جوّات عينيّ، ليش عم بتذكّر لقاءاتنا القليلة وإبتسم مع إنّو كنّا نضل نتخانق، وكيف رجْعت ريحتك تحركش فيي
بعرف ما رح نلتقي، ولكن ما بعرف ليش عيني ع الباب بلكي بيطلع ضو سيّارتك ع ليل الطريق، قبل ما تعربش دعساتك ع الدرج وبين ورق الشجر، وتنطر ع إفتحلك
بعرف ما رح نلتقي، ولكن ما بعرف ليش قلبي عم يدقّ بسرعة كأنّو رح نلتقي بعد شوي، وعتلانه همّ إذا التقينا تكون تغيّرت وما عدت تشبه حالك… وما تنتبه للون ع ضفيري وللعطر، وتسألني لشو لابسة هالفستان بعزّ الشتي، وقول يا ريت ما التقينا
ولكن بعرفك، بعرفك منيح، متل ما بعرف إنّو ما رح نلتقي
٢٠١٩
