صِرْتِي مَرَا عَ السَّكِتْ

ألان جرجورة

إِنْتِي مَرَا
صِرْتِي مَرَا عَ السَّكِتْ،
نِتْفِه وَرَا نِتْفِه تْعَرَّيتْي…
مِتْلِ الثَّوَانِي لْ هَرِّتِ مْنِ الْوَقِتْ،
مِنْ خَجِلْتِكْ عَ اللَّسّ هِرَّيْتِي…
وْصِرْتِي مَرَا
نْ لِبْسِتْ شِ مَرَّه تْيَابْ
بِتْفِيقِ الْبِنِتْ
وِاللِّي فِيَا قِدَّامْ بِيْصَفِّي وَرَا…
مِتْلِ لْ: وِقِعْ عَنْ شَجِرْتُو الْعِنَّابْ…
مِتْلِكْ مِتِلْ الِكْتَابْ
وَقْتِ بْيِنْقَرَا
بْيِرْجَعْ خَشَبْ كِذَّابْ…
مِتْلِ الْقَلَمْ حَتَّى الْقَصِيدِه تْسَاعْ
جِسْمُو بْيِنْبَرَا…
مِتْلِ لْ فِ بَيْتِ مْشَرَّع بْلَا بْوَابْ…
مِتْلِ لْ تَ فَتَّحْ عُمِرْ صِدْرِ الْقَنْطَرَا
تْعَلِّتْ عَ كِتْفِ عْتَابْ…
إِنْتِي مَرَا شْفَافِكِ كْتِيرُ وْسَاعْ
وِسْعِ الْمَحْبَرَه
وْوِسْعِ الْمَدَى بْحِلْمِ الضَّبَابْ…
إِنْتِي مَرَا وْلَوْ قَدّ مَ جْبِيْنِكْ عِلِي
بْتِبْقِي إِلِي
وْصِدْرِكْ… تَحْتِ دَيِّي اللِّي عِلْيُو قْبابْ…
إِنْتِي أَنَا نْ مَا جَاعْ
بِتْهِرِّ الْمَرَا
وْمَبْتِدِلْفِي شَهْوِه بِبَالِي التَّابْ
وْمَبْتِشِرْقِي مِتْلِ الشَّمِسْ فَوْقِ الِضْيَاعْ
وِبْتَاكْلِكْ تَحْتِ الْعَتِمْ الِضْبَاعْ
وْجِسْمِكْ؟ بِصِيرِ غْيَابْ..