رئيس التحرير: إخلاص فرنسيس 
الملتقى
إبراهيم شحرور
في ناس قالو وقت شافوني
في حزن بِ عْيوني
قصدُن حزن من بين هالأحزان
شي حزن … من درب الفرح هربان
وْيمكن يكون الصبح بِ عْيوني
وْبعد الضهر بِ عْيون مين ما كان
يا حزن … مش فهمان
مش إنتْ قايل … أو أنا غلطان
إنّك مَ فيك تْعيش من دُوني
وْلَو صرت مرّه طيْر بالبستان
وْعا ألف شجره يعزمَك نيسان
لازم تعمّر بيت … عَ غْصوني
ناسي بِ هاك البيْت
قدّيش عا ضَوّ الحزن سهران
وْلمّا فْرِحِت مرّه … وْإنِت فلّيْت
غنّيت : نحنا والحزن … جيران
يا حزن لو فلّيْت … مش زعلان
إسمك ” الْحزن ” … وْفي إلَك عنوان
عنوانَك : عْيوني
وْلمّا رحت تَ تْصير “حزن ” فْلان
نْسِيتِ الْ ” ألِف واللام ” … بِ عْيوني
