رئيس التحرير: إخلاص فرنسيس 
الملتقى
الان جرجورة
كنّا زغار ووقت مَ تشتّي الدّني بِ شباط
والشّمس تشلح كلّ ألوانا
وِتْنَشّرُن عا حبال بلكونا
وْتُضْوي السّما متل: الْمَرَق خيّاط
طَرَّز بِ خَيط الضَّو فستانا
كنَّا زغار نْحِسّ شبّاكا انْفَتَح
تَ تسكّر طواقي البكي فينا
تنشر غسيلا…لْوان تعطينا
وكنّا نسمّي مَنْشَرا “قَوس الْقَدَح”
……………………
شُ انْقال خبريّات عن قوس القدح:
“تِنِّين من تمّ الشّمس نطّ وْسَرَح”
في ولاد قالو: “فوق في رسّام
كلما بكي ألله وْتِعِب، بينام
وِبيسرُق الرسّام من ألله الفرح
تَ يلوّن الإيّام”
وفي ولاد قالو: “نسر مارق وانْجَرح”
…………………..
احلا حكي هوّي الحكي اللي قال:
“قوس القدح مَمْرَق بِ غَيِّر حال
لو قَرّبِت مِنّو بِ ردّك لا ورا
ومن تحت باطو لو مرق رجّالْ
بيصفّي مَرا
