إلى أبي

كاتيا سلامي

بِيَوم هَيك كان حَبيبي
يقِلّي
تَعي هَون قْعَدي بِقَلبي
وغِلّي
حابِبْ إسمَعِك
وشوف بِوِجّك الكَون
وشوف كيف عَم تِكبَري
وتِتحَلّي
بِيَوم مَرجَحني عَ زِندو
الهَنا وِالنَوم
وقَلّي يا رَيت هَيكْ
بِتضَلّي
وِبسافِر بِحِلمي وبِسِرقِك
مِن هَون
وبُطلُب مِن رَبّي لا
ما تفِلّي
وإبكي مِتل القَمَر
مِن كِتر العَتَب وِاللَّوم
وِالسَهَر يُرقُص بِهاللَّيل
مَع ظِلّي
وِالسَما تِقلُب بِمِيِّة لَون
ولَون
ولَونْ السَما بِعيونِك
تمَلّي
وِالشَمس تُغمُر بِنورا الكَون
وإنتِ بِدَفا روحِك
عُمرِك تمَلّي
ولِم تِكبَري يا حِلوتي بِيَوم
نَجم عالي عَ أبعَد كَون
سِعر مَهرِك بغَلّي
بِيَوم
هَيك كان حَبيبي
يِحبُس دَمعِة عُمر
وإيّام بِتوَلّي
شو كانوا حِلوين حَكياتو
وشو كان يِشكي إلي
وِيقِلّي
إسمَعو وراسي مِتِّكي
عَ صَدرو
وشو كان حَنون صَدرو
يا دِللّي
بَعدني بِذكُر كِلماتو
بِيَوم مِتل هَاليَوم
اشتَقتِلَّك أنا يا بَيّي
.إنت ما اشتَقتلّي