رئيس التحرير: إخلاص فرنسيس 
الملتقى
عامر عامر
شايف حقيقة ناقصة
وِ مْلَفلفِة بِ حرام
ع طراف عاصمة الكذب ب تنام
بِ بلاد ما فيها مَلَك
تعربِش ع سورا اللي نْتَلا أعلام
تْدَوِّر ع نُصّا اللي نْحَكَم إعدام
يعَلِّم ع زِندا زيح كِرباج الدَرَك
و شايف في حفلة خاصّة
و “نُصّ الحقيقة” معلّقة بحبلِة
بعينا في دمعة و غاصة
القاضي اْلتَهى بالراقصة
و عم يشلح البدلة
و بعدا لهلق ماشيي الحفلة
و برا المدينة ال حَيطها … واطي
“نُصّ الحقيقة” بعدها … بَرّا
تبيع اللي ضَلّو و الزمن شرّا
تقِلّن يا مين بْ يِسمع عياطي
جرَيي ع كتر الشمس مسمرّة
و طلع الشعر ع لسان صباطي
و شايف شمس كل مانا عم توطى
الميّ اللي بِقيو عصَرتُن بْ فوطة
جايي العَطَش ع بلادنا مأخّر
و خيفان نُصّ البحر… يِتبَخّر
و الجوع زتّولو حَسَك
شايف مدينة و سقف عملوه بشَبَك
بركي بيِجي شي نهار و تشتّي سَمَك
