رئيس التحرير: إخلاص فرنسيس 
الملتقى
الليل مش ضلمة وأنّة ريح
الليل تبارح
الليل مبقاش ستر ومكنون
الليل بقى حرب وضرب وخوف
وسفر وجنون
الليل مسجون
مستنى نهار
يفتح له جدار ويقابل شمس
وبعلو الصوت وبضى الهمس
يصرخ ويقول
أنا ليل سهران غصب عنى
بقى نفسى ارتاح وانام فى براح الدنيا وحيد
من غير مجاريح .. من غير تنهيد
من غير عشاق بتعانى الفرقة أو التباريح
من غير كوابيس واولاد ابليس
تضحك ع الخوف فى عيون الناس
وقلوب الناس ونفوس الناس
******
أنا ليل ضلمة مخاصمنى البدر
ويدوب كام يوم يجيى ويمر
من غير ما يقول ولا حتى سلام
*******
الليل مش همس
الليل بقى حبس وسد ودان
الليل غلبان
سهد وهجران
أشواق وحنين
لسنين فاتت ولناس غايبين
******
فى الليل الثانية تعدى ساعات
والعمر يمر يكر آهات
والهم ثقيل مش سايب حد
بركان أحزان
وغريب عريان فى زمان البرد
*******
الليل تباريح مش هزة ريح ولا أنّة قلب
الليل بيحب والحب حرام فى زمان الكدب
متقولش لحد إنّك بتحب
دارى علشان الشمعة تقيد
مبقاش فى زمانا البوح بيفيد
كل المواعيد أضغاث أحلام
كل الأحلام من غير مواعيد
لو قادر سافر جوه الحلم
يمكن فى الحلم تقابل ناس من زمن الصدق
أو حتى تووه فى دروب الحلم
ويعدى الليل
