دَيْرِ لْ وَئْتْ

© written by : V. Rebelde ★

بْ دَيْرِ لْ وَئِتْ .. كِلِّ لْ بَشَر صِلْبَانْ
مَا فِي حَدَا بَرَّاتِ دَيْرِ لْ وَئْتْ
كِلْ مِنْ خِلِءْ عِلْئَانْ
مْحَابِيسِ لَوْ خُوتَانْ
عَمْ يِركِدُو وِلْ رَكْدِ مِشْ سِئْلَانْ
مْرَكْدَكْ مَعُو .. وِلْ رَاكِدِينِ كْتَار
لْ عَمْ تِطلَعُو .. تَا تِلْمَعُو
نْجُومِ بْ فَلَا لْ مِشْوَار
لْ عَمْ يِنْزَلُو تَا يِركَعُو
بِ مْسَاكِبِ لْ أبْرَار
وِلْ مَا حَدَا لْ حَامِلْ عَ كِتْفُو زْغَارِ .. بِئْيُو زْغَار
بْ دَيْرِ لْ وَئِتْ كِلِّ لْ دِنِي … زُوَّار
وْمِتْلِ لْ سَبَئْنِي لْ رَكْدِ .. مِنُّو فْلَتّ
بْ حَئْلِةْ عِمِر .. صَحرَا
بِتْطَلَّعِ بْ شُوفَكْ زَمَنْ خِتْيَار
بِ دفَاتِرِ رفُوفِ لْ دَهِر .. غَبْرَا
وِعيَاطِ عَمْ تِشْلِي وْعَتِمْ .. وِزْعِلْتْ
نَفَّضْتِ عِينَيِّي
وِركَدتِ عَا دَيِّي
يِمْكِنْ بَعِد فِي وَئْتْ
بْ دَيْرِ لْ وَئِتْ
تَا تُوئَفِ دئِيئِةْ صَمِتْ
وِتْشُوفِ مِنْ جَارِر مَعَكْ
تَا تُوصَلِ … وْمَا أوْجَعَكْ
عَمْ يِخْلَصُو وْرَاءِ لْ عِمِر ..عَمْ يِخْلَصُو عَلْ سَكْتْ
مِشْ هَمِّ شُو بْ يِخْلَص مَعُنْ
مِشْ هَمِّ كِيفِ تْلَمِّعُنْ
لِ مْهِمِّ بَعدِ لْ مَوْتِ مَا فِي وَئْتْ
رَح شُوفَكِ بْ وِجِّي أبَد وِتْشُوفْ
كِيفِ نْحَفَر إسْمَكْ بِ أيَّ كْفُوفْ
وْرَح إلَّكِ (…….)
دَيْرِ لْ وَئْتْ
© written by : V. Rebelde ★