رئيس التحرير: إخلاص فرنسيس 
الملتقى
أنا بْعزّ الغفا بْحَوّل عليّي
سَلّق بالشعرْ حقلة يديّي !
متل ما بحرنا للكون قَلّو :
سَلّق من الموج الأبجديّه…
وْأنا راعي مروجي ولادْ ضَلّو
بتيابن ينامو من عَشيّه
وْبِراس الصبح لمّا الصبح عَلّو :
طلعتْ عَ الجرد سَرّحلن الفَيّه !
وانا شاعر حنيني بَوحْ كلّو :
متل بَوح البكي بالمجدليّه …
بحتْ للنبعْ جاب جْرار مَلّو
وضوي قلبو وعَزَمْ لحقول فيّي..
وانا شاعر غَطا ه الشمس ظلّو
تاتتدفّى ع ظلّ الشاعريّه
وزرع كفّو ، أخد نوّار فِلّو
ورد ابيض ع تمّ المزهريّه
وانا جروحي بِدير الملح صَلّو
تاتلبس ه الخميره الخبز نِيّه
ووقتْ صرّو العمر فِيّي وفَلّو :
أهلي بالبساتين الهَنيّه …
فَلّو كتير بسّ كتير ضَلّو
وت ما يبقى الصدى يْخزّق محلّو
رقّعت الصدى بْصوتي شويّه !
