شنطة بكي

يمكن عَشيّه النَعَسْ
ينعَس على لْحافي …
ويمكنْ عَبُكرا الزمان يْنخّ بِكْتافي !
وْيمكن وْيمكنْ بتنطر ت يجي نوّارْ :
يلاقي الليل انْخَزَق
والنَوم مش غافي
أحلى لَ حالو النهر تا يْروح شي مشوارْ :
وْناسي صَبيعو بْخمس صابيع صفصافه !
وْهوّي وماشي حفَا
بْدعسة ولاد زْغارْ :
بْيوصل يشوف السَهلْ
فيه العشب حافي !
هَ العمر شنطة بكي ،
عَ مفرق التذكارْ
والوقتْ صرّة مَلانه تْراب وِمْسافه
قِلّو : يا صبح الهنا ،
جبلي معَك شي نْهارْ
بْطَبّق رموش السَكتْ
وِبْسَفّر شْفافي …