رئيس التحرير: إخلاص فرنسيس 
الملتقى
عَ مَهْلهُن إيدَيكْ :
هنّي وعم يْفكّو النَطرَه ع الخصرْ
عَ مَهْلهُن عينَيكْ
هنّي وعم يمزّو عنَب كَرم العَصرْ !
حلوين إيدَيك بْيجو :
يتفرّجو
ويكّرجو
تْيابي نزولْ
وحلوين عِينَيك بْيجو :
يتْغَنّجو
ويسَيّجو
خَصري الملَحّن عَ وَتر مشغولْ
شُو كانت السَهره بعيده عَ الورقْ ،
لَو ما تجي :
تِرْمي العتمه الحافيه بِبْنَفسجه ،
وتسحب تيابي مْن الغَرَقْ !
شو كانت الحَفله قديمه عَ الوَترْ ،
لا إيدْ
لا شبّاك يفتَح من بعيدْ !
لا صَوت يخزَق هَ المسافه ،
لا بَريدْ
يكسر مرايات الضَجرْ
لا كاس يطلَعلو المسا دَقن النبيدْ
ويندَه : تَعا لْ تمِّي شي ليلة عيدْ !
وجِيت انْتَلْيو مْن الشِعر لِوراقْ ،
والكاس مشتاق ،
وْأنا مشتاقْ !
نْفَكْفِك خَرز ضَهر العمرْ ،
عَ الجَمرْ
ونغلّ ، تِتْكسّر ضلوع النارْ
وما يْضلّ عَ بَيدر الساعه غمرْ
ولا يْضلّ بِعْراوه العَراوه زْرارْ !
