رئيس التحرير: إخلاص فرنسيس 
الملتقى
وْقفتي عَ الِمْرايِه
وطاف العيد
جوّات المرايه ،
متل برّا …
نيّالها
عصفورها بالإيد
وْكرمي أنا يابس
بلا عْناقيد
وْقلبي بَلا عْصافير
بالْمَرّه …
صارت بتعرف
صوتِك من بعيد
بتعرف اذا مرّه
شربتي نْبيد
وقدّيش كانت
قهوتِك مُرّه…
شو لابسه
شو عندك مواعيد
مع مين بدّك
تكسري الجرّه …
وْكلما تغيبي ،
شوقها بيزيد
وصارت
بعد ما شافتك مرّه
تنطر قبالا
تمرقي من جْديد
وتوقف ع المرايه
وْتتمرّى …
