نَهْر الِقْيامي

المحرر 5 يونيو، 2023

حبيب يونس

هَـ النَّهْر تِلْميز
وْإِبِنْ عَيْلي عَتيقا
بْمَدْرَسِةْ تاريخ فينيقي
وْآرامي
جِدّو إِلَه الآلها
بَيّو إِلَه
وْمين إِمّو؟
عِشْتَرِتْ
هاك الْإلاها اللي نْخَجَلْ مِنّا الرَّبيع
وْما نِسي يِكْتُبْ إِلا
بْمَيّ الصَّبيعْ
بْضَيّفِكْ طول الْعِمِرْ
زَهْرِةْ شَبابي وْعِطْر إِيّامي
هَـ النَّهْر بَعْدو مْعَنْزَق مْن زْمان
بَيْنْ جِرْد وْبَحِرْ
حافِظْ دروسو مْنيح
كَرْجِةْ مَيّ
وِمْغَيِّبُنْ
هَيْدي قَصيدي لِلشَّمِسْ
هَيْدي قَصيدِةْ فَيّ
كارِجْ وراسو طْلوع
عَمْ يِدْفُقْ
وهادِرْ خَيْر قِدّامي
مَرّا قَصَدْ هَـ الْمَدْرَسي
رَبّ الشِّعِرْ
قال لْمُديرا: لَيْش غِيَّرْتو إِسِمْ هَـ النَّهْر؟
مِنْ شو كان يِشْكي عَ السَّمَعْ
إِسْمو الْقَديمْ
مْقَدَّس بْأُسْطورِة السَّيِّدْ
وضَلّ مْقَدَّس بْإِسْم بْراهيمْ
قِلّي، خْطَيّ، وْرَيِّحْ قْلامي
وْمِنْ قَبْل ما يْرِدّ الْمُدير
النَّهْر عَلّا نَبْرتو
وْجَاوَبْ إِلَه الشِّعْر، شِعْر بْهَدْرتو
إِسْمي الْقَديمْ
مِنْ مَجْد كِنْعاني
وْإِسْم بْراهيمْ
تِبْشير سِرْياني ولِبْناني
ما بْيَوْم إِلّا نْبَعْت قامي
وِكْرَجِتْ قامي
تِلْميز شاطِرْ رافِع الْهامي
وْإِسْمي بيِهْدُرْ عَ جبيني
نَهْر الِقْيامي.
حبيب يونس
28 – 5 – 2023