أوضه فاضيِه

بْتنطُر يِجِي … تا تسألو شو باك
بْتلبس عيون جداد … عَ المُوضه
كترة ما زرْعِت ورد عَ الشبّاك
بالعطر صارت تنتلي … الأوضه

ركوة القهوِه زهْقِتِ مْنِ النار
وْما خبَّر الفنجان شو اللي صار
صارت الشمس بْ آخر المشوار
وْبالعتم صارت تنتلي …الأوضه

والصيف فَلّ وهرهَر الياسمين
وفلّو عصافير العنب والتين
وْدبْلِتِ النطره عا هَوا تشرين
وبالبرد صارت تنتلي…الأوضه

بْتنطُر يجي تا تسألو : ” شو باك
الشبَاك متلي صار يستنّاك
صرلي عمر بنطُر عَ هالشبّاك
تا صار شبّاك وْإلو … أوضه ”

…