ديوك الحجل

محمود بو حمدان

عم يطلعوا ديوك الحجل عالشِّير
عم يوقفوا يغنوا
وقت الفَقِد
هيك الغنا بيصير
بــِ رقّ صوتو كتير
بلكي اللي غابوا شوي بيحنو
طير الحجل… مني اسمعوا عنّو
يبقى مْعَرِّم… هيك مصلحتو
وسهل القمح… كلو قمح تحتو
ومتعوب عا نحتو
وبتحسّ لما يقبّ حتى يطير
بيعلّموا زياحو
وجوانحو رتاحو
ولما عَ بالو تْعِنّ المشاوير
بـِ رِفّ عِنْد غْياب النواطير
تا تْنَقْوِد عْيون الدِّني منّو
———————————
دْيوك الحجل بس يوقفوا عالحَرْف ويطلّوا
ما بيرجعوا يكِلّوا
بيحركوا طيور الجبل كلّو
وبتصير تسأل من بعد ما تشوف
شو غيرن!! ؟؟ مدري!! ؟؟
كيف انتلوا دغري
وكيف الحكي اللي كان مش معروف
صَفّى غزل دافي حلو ومِغري
———————————-
ديوك الحجل ما بيوسعن مطرح
بَيْتُن فَضَا فلتان ومرحرح
جرِّب شي مرة تحبسن
بيفكفكوا عراوي القفص
بيتفيلتوا لولا زَرِك بين الفرص
عا مطرح الأشرح
ورفّ الحجل بس يستوي العنّاب
والصيف يسرق شو بقيله تياب
بيصير يوقف رافع كتافُه
والتوت يكتب شِعِر عا شْفافُه
ما أجملا القصدان البعيدة
طلِّة مَـرا جديدة