ألان جرجورة
![](https://theroom19.com/wp-content/uploads/2022/06/ألان-جرجورة-.jpeg)
(يا ريت الساعه بـ 4 آب كانت جمدت عَ الـ 6 وما صار اللي صار)
غَطَّا الدِّني بْ شَرْشَفْ عَتِمْ مَخْزوقْ
مِنُّو نْ دَلَقْ ضَوُّ وْقَعَدْ وَحْدو
وْ تَ يْخَيْطو قَطًّبْ قَمَرْ قَدُّو
مْنِ لْ أَرِضْ قالو هَلْ قَمَرْ مَسْروقْ
وِلْ يَوْمْ فِي مَرْفَأْ غِفِي مَحْروقْ
مِتْلِ لْ عَتِمْ، قُطْبِةْ أَمَلْ بَدُّو
قُطْبِةْ قَمَرْ ضَوُّو حِلِمْ مَدْلوقْ
وِسْعِ لْ بَحِرْ خَدُّو
بَرْكي لْ عَتِمْ عَ الشَّطْ لَحْظَا يْموتْ
وِيْموتْ نِتْفِي مْنِ لْ وَقِتْ حَدُّو
وْألله مِنِ جْروحِ الزَّمانْ يْفوتْ
يْوَقِّفِ لْ وَقْتُ وْيِنْصَلَبْ عِنْدو
لْ عَقْرَبْ على السِّتِّي (٦) صليبو يْكونْ
يجْمَدو وْخَمْسي (و٥) لْ بَعِدْ مَ نْ عَدُّو
لِبْنانْ عا ألله بَعِدْ بِيمونْ
يرْتي على السِّتِّي(٦) قَمَرْ بيروتْ
وْقُوني عَ صِدْرا يرْجَعِ يْرِدُّو