رئيس التحرير: إخلاص فرنسيس 
الملتقى
عامر عامر
ضوّي ورايي الضوّ قايم فِلّ
غالي العتم و الليل عم يِبهَت
وإبقي كتَري بِ غيبتي و رح قِل
وِنْ طَلّ من عندي الصبح بِبْعَت
فالل ع ضوّ جديد عم يِغمَق
آخد معي اشعار كِلّا ملبكَة
و حروف كل ما تلبّكت تِعرَق
و وراق بِ حبر الحكي بتِغرَق
و تياب نصّا مجعلكي
و عبيت كيس من البكي
من بيت المخدّة
و تارك ع حفّة مَكتَبك خَدّي
في علَيه ريحة سهوتي
و جارور مكسور القِفِل
و فنجان في بْ كَعبو تِفِل
و عالغاز ركوة قهوتي
تارك ع تختِك شهوتي
و ما تفتحي
نْ دقّو عليكي بغَيبتي
رِدّي البرادي
و ضَيْعي مْفاتيح الباب
و ما تفتحي
نْ دقّت عليكي خَيبتي
علّي الأغاني كتير
ضَيْعي صدى الغياب
و صيري رقصي و الكاس بِ إيدك
غمضي عِنَيكي و حبِسي الدمعة
يصير الدمع بِ طعمة نبيدِك
عنقود ع خدّك نِشِف شمعة
و بَس تِسكري و تفوتي ل َ تنامي
تِعبُق بِ وجّك ريحة حرامي
ومتل الصَّدف أصوات تحتو تسمعي
سكري بِ جفنِك ع البِقي من الضَوّ
و مَسحي عن الفَقسات بصمة اصبعي
و ضلّي كْتَري و رح أوعدِك
رح ضلّ اكتر قِلّ
