رئيس التحرير: إخلاص فرنسيس 
الملتقى
الان نقولا جرجورة
أوقات بُقرا الوقت بِ قماش لِ تْيابْ
وقت لْ عليّي بْ يعتقو تيابي
.
وأوقات بيصير الوقت كذّابْ
لمّا الشمس بِتنام بِ الغابي
وْبتكون عم بِتخون عَ الضُّهرِ لِ غْيابْ
لحظة لْ تغفى بْ حضن لِ ضْبابي
.
والوقت متل القَوس والنشّاب
بْ ردّو لْ ورا عَ المطرح الرّابي
بْ مغّيطة الذكرى تَ حتّى نْ جاب
من زغرتي جنازير دبّابي
يفلت عَ بُكرا لْ صار حقل نياب
.
ووقت الخريف يخيّط الجلباب
ويشكشكو بْ عنّاب
ويهرّ منّو عَ العتاب عتاب
بضهر بْ كنّس وقت عن بابي
.
وأوقات بِعرق وقت بِ جنينة كتاب
كل ما إجو من ترابن الغيّاب
بِحبس الوقت الدّاب بِ خوابي
وبنسى الوقت محبوس… والسرساب
جابي وْ عَ بابي واقف الجابي
وعم بِختِنِق… جسمي ملان جياب
وْما ضَلّ ليرة وقت بِ جيابي
