فديته
الليلة برد وحارسك يا عين نايم
والبحر هايج والدمع طاح وخفيته
والصبح كذبه دام جو الصبح غايم
والنور اسمك دام في نحرك قريته
عادلي يومين لجل الحب صايم
وعاد لك شهرين لك ذنب وخطيته
التمس عذر الزمن وأقول هايم
واحتفل دام الصبر مفتاح بيته
شلني بأطراف رمشك وانت قايم
خلني أسأل متى عشقي نسيته
الوله والحب خلى الشوق دايم
والسهر والخوف في بعدك لقيته
دام عشقي ف السما يا شوق حايم
خلني أكتب وسط شعري فديته
عادلي يومين لجل الحب صايم
وعاد لك شهرين لك ذنب وخطيته
خطأ …
الخطا أني احبه … ذَا خطا
والمصيبه … ما تعلمت الصواب
حبه اللي كل يأخذ ما عطا
ولو عطى يعطي على قياس الثياب
واللي اصعب انه حبه لي سطا
لو اتوبه ( مستحيل القلب تاب )
واللي اسرع .. كلها أيامي بطا
والغريبه عادي عنده ذَا الغياب
قلبي اللي بجمر حبه جاء وطأ
ولو يجيني أنسى جمره والعذاب
انا له بالخافيه … ( ستر وغطا )
وانا له بالعافيه .. غيم وسحاب
اتبعه واتبع سرابه والخطا
لو مشيته .. وادري انه ذَا سراب
المصيبه ادري حبه ذَا خطا
والمصيبه ما تعلمت الصواب
