رئيس التحرير: إخلاص فرنسيس 
الملتقى
عِنْدِي عَدُوّ مْفَرْعَنْ مْزَنْطَرْ
كلّ يومْ عَمْ نِتْخَانَقْ علَيكي
بَدُّو عَطُولْ يْلَزِّقْ علَيكي
وْمِتْلُو أنا… وْأَكْتَرْ…
.
شُ بْحِبّ شِلُّو دَيهْ عَنْ دَيكي
وْوَقِّعْ صَبيعي بَينِكْ وْبَيْنُو
وْتِتْزَكْزَكِي وْحُطَّا عَلَى عَيْنُو
وْإِتْنَحْنَح وْإِكْبَرْ بِ عَيْنَيْكي
وْعَرِّمْ مِتِلْ عَنْتَرْ…
.
وْوَقتِ لِ بْزِتُّو تَحِتْ إِجْرَيكي
وِبْتُوقَفِي قْبَالي بَلَا فسْتَانْ
بُوقَفْ أَنَا خِيَّالْ حَدّ حصَانْ
وِبْصِيرْ قَرِّبْ بِ الْعَتِمْ لَيْكِي
وْيُصهَلْ قْبَالي جِسْمِك مْجَمَّرْ
.
وْتَا يِنْتِقِمْ فسْتَانِكْ الْمَجْرُوحْ
عَجْرُوحْ قَلْبُو يْصِيرْ يِتْجَبَّرْ
يُنْفُضْ مِتِلْ: لَحظِةْ طْلُوع الرُّوحْ
يْطَرْطِشْ بِ لَونُو جِسْمِكْ الْأَسْمَرْ
وْوِجِّي لْ عَجِسْمِكْ عَمْ يِجِي وِيْرُوحْ
يِتْقَمَّصُو فستانِكْ الأحمَرْ…
