رئيس التحرير: إخلاص فرنسيس 
الملتقى
مي عاطف
(عنوان طويل كيف النص ؟😂 )
فقت كما العادة عَ خفقان بهالقلب ، وعندي احتمالين
خفقان من الحب
أو
خفقان من المجهول ..مبارح نمت ع المجهول (وبعدين ؟؟؟؟ ) طبيعي فيق عم زحلط والقلب خايف
المهم يا أوادم (للامانة ما بعرف إذا الكل أوادم 😎) أخدت نفس طويل وقلت : ولو مي ليش كل هالتفكير …خلص.. مبارح كنت عم تفصلي حواسك ..افصلي ويالله
وفعلا كان الأمر وقلت : اصطبحت والصبح لله ..يا فتاح يا عليم ( طبعا ما غنيت والجيب ما فيه ولا مليم )
وعملت طنجرة قهوة وحطيت الراديو (لأني بحب اسمع أغاني ما حسب مزاجي ..اصلا ما بعرف شو مزاجي ..بلكي طلعت أغنية وعرفتني مزاجي ) وركزت القعدة ع طاولتي لكمل النص اللي إلو ناطر مدري من ايمتى .. وشعلت سيجارة وشربت شفة قهوة ولسا ما وصلت اصابعي ع الكيبورد
سمعت خرير المياه في خزان المي (رميت الورد طفيت الشمع يا حبيبي ) وفزيت بأربعتي (نعم أربعتي كأي حيوان على البسيطة )
وقلت لألحق عبي قناني المي واجلي الجليات قبل ما تنقطع …غسلت القناني …صارت المي سلك ناعم وقعدي يا مي انتظري ايمتى تتملى قنينة المي
اصطبحت مرة تانية وقلت الملك لله … وجهزت الغسالة والسخان لوفر غاز وشغلت دينامو المي ..المفترض الكهربا عالسبعة بتجي
وجابوها عالسبعة (ودارت الايام والغسالة والمي اجت قوية والطنجرة ع السخان ) انقطعت الكهربا …رجعت المي خيط
والنّص ابن الكلب قال شو .. لاحقني وبيزن في رأسي :هلق ولادك نايمين ..بس فاقوا صار عندك التزامات تانية استعجلي
وقفت بنص المطبخ … سبيت ما تيسر لي من إصابات مباشرة للاعضاء جميعها
ايجت الكهربا ومتل روبوت رجعت عالمجلى وبإيدي قنينة مي
انقطعت الكهربا انقطعت المي وقفت بلا حراك ..مشهد بانتوميم وحوار داخلي مليء بالرضا والصفح والريلاكس (اوكي يا مي طولي بالك ..شوي وبتجي الكهربا ورح تخلصي شغل ..ما مهم وقتك المهم الشغل ..ما مهم عمرك المهم تجي الكهربا )
وإجت الكهربا ولسا ما تعبت القنينة ..قطعوها
وهكذا بقيت ما يقارب الساعتين لأجل ان أملأ سبع قناني مي حتى ما نعطش خلال النهار
رح تسألوني وين راحوا الخمس دقائق اللي بالعنوان ..رح خبركن انه كنت عم دور عالجانب المضيء أثناء الزحلطة .. فغنيت مع فيروز
(شآم ما المجد ؟
انت المجد لم يغب )
وبأغنية أَخرى
(وطني وحياتك وحياة المحبة
شو بني ..عم تكبر وتكبر بقلبي )
أما عن الثانيتين فكنت أقهقه
المصور ابني وما بلحظتها بس تناسب الحدث …وحلوة لا تقولوا ما حلوة 🤔
