صوتك

عامر عامر

قصيدة بالمحكية للشاعر
عامر عامر

صوتك
كان الربيع جديد بعدو بأوّلو
و كان السمع بِ وقتها ممنوع
هالناس خِلقو بس تَ يِتأمّلو
و ما في صدى مسموع
ممنوع حتى يسألو ..!
و هبّ الهوا و ما عاد قِدرو تْحَمّلوا
و عِلقِت مَ بين الوَرد بالساحة
الله و ملاك الصّوت دِغري تدخّلو
تَ يِقنعوا صَوتِك بِ تِفّاحة ..!
و مِن يَومِتا عْليهُن نِزِل صوتِك
بْنفس النهار اللي نزل آدم
في ناس صارو من بني آدم
وْفي ناس صارو من بني… صوتِك !