رئيس التحرير: إخلاص فرنسيس 
الملتقى
زياد عقيقي
مرحبا يا أرزة الخضرا
يا معملقة عالريح
يا ساندة نجوم السما
ت تضلّها وما تزيح
مرحبا يا أرزة الخضرا
يا صامدة بوج الخطر
يا مكلّله جبينك كبر
مهما قسي عليك القدر
يقسى ويقسا منيح
باقية يا أرزة الخضرا
بقوة الحق وجيشك القدره
صامدة بوجّ الخطر والريح
وشو همّك من الريح
مهما تصيح
***
مرحبا يا مسوّره برجال
العتمة التفّوا بمشلحا
وهمومهن شو تقال
وراحوا بطريق مجرّحة
ما زارها خيّال
همّن تضلّي مصوّنه
وبالعز تبقي مزيّنة
ولو هبطت كلّ الدني
تفنى الدني
والأرز ما ينطال
***
مرحبا يا أرز يا أخضر
أخضر وعالي غصون
مرحبا وبتضلّ يا أخضر
أخضر متل الله الخلق
أخضر متل هالما احترق
تا ينبسط نيرون
أخضر متل آخر شلح
حدّ السما بيكون
ويا ويل ويلن عالأرز
لولا يمدّو عيون
***
مرحبا يا حارس التلاّت
جبينك كأنّو ساند النجمة
كلمة (بطل) مهما لها فيّات
عا طلّتك شو بتزغر الكلمة
إنت البطولة ..العزّ …الحكايات
بيّ الوطن
إيديك هاتن … هات
غمور الوطن تا تمنع القسمه
***
مرحبا يا حامل البرده
ويدفا الوطن ما عليش
لولاك كان الغيم بيصدّي
وكانت عم تشتّي عتم
قدّيش
ما كان ورّتني القمر جدّي
لو ما وجود الجيش
ما كان ورّتني الشرف جدّي
لوما شرف هالجيش
ما كان شبر تراب بيهدّي
لوما يضحّي الجيش
لا في جرس لا ميدنة تودّي
لوما وفا هالجيش
صوتك يا صوت اللأ
بوجّ الما عندو حقّ
لأ الما نسأل ليش
لأ اللي ما بتنردّ
وإيد اللي رح تنمدّ
سيفك لإلها حدّ
سيفك يا عيد الجد
سيفك يا عيد البال
وخيالك الخيّال
وهودي اللي دبحو الليل
وصبغو القمر أسود
ردّن ع تاني ميل
عالأبعد الأبعد
وأرض الما عندا إمّ
ضمّا ع صدرك ضمّ
لا تخلّيا لحالا
خدها بإيد الهمّ
تا تضحك تلالا
ع تلال..عالوديان
طمّ الأعادي طمّ
دمّك نسغ أرزة
مطرح ما ينزل دمّ
بتنبت ألف أرزة
بيعلى علم لبنان
***
مرحبا يا جيش يا معلّي
يا مدرسة أخلاق
ان صاروا الودايا
بعدك التلّه
وبعدك النسر
وبعدن البزّاق
مرحبا يا مخوّفن
يا مرجّفن
يا معلّمن معنى الوطن ومعرّفن
إنّو الوطن ما بيعرفن
إنّو الوطن رح يقرفن
إنّو الوطن أكبر بعد
من كل كل مواقفن
يا مشوّفن إنّو التآخي بالوطن بيشرّفن
مرحبا يا أشرفن
يا أكبرن
يا ألطفن
بالعزّ لولا منوصفك
بالعار لولا منوصفن
هالفرّخو بغفلة زمن
صاروا مصيبة عالوطن
مين غيرك البيوقّفن
ع حدودن وبيعرّفن
إنّو الوطن …باقي الوطن
والأرز للإعدا كفن
ولو قدّ ما تزيد الفتن
باقي الوطن…باقي الوطن
وهنّي الما عدنا نعرفن
هني ..رح بيوعى الزمن ويقردفن
التاريخ …نهر ويجرفن
عالبحر ولآخر سمك بيضيّفن
يا أرزة الخضرا اشهدي
باقي الوطن
باقي الوطن
باقي الوطن
