الشاعر يگول:
ذيچ من ذيچ الأصيله،
القانعه بربها ورحمته،
وعايشه بسد المكينه.
هسه ذاكرتي تدرون وين راحت من قريت هذني الابيات؟ راحت الى سنة 1994 من تعرفت على “خالدة الخياطة” قبل (31). الحصار الاقتصادي على العراق، خله اغلب العالم تلبس الملابس القديمة وتحور بيها. احنه من البيوت الي امهاتنا تلملنه قطع قماش، وتصرهن بالبقچ، وگت اللزوم نطلعلنه كم قطعة، نخيطها ونفرح بيها. سنة 1994من دخلت كلية فنون، چنت فرحانة لان خلصت اخيرا من لبس الصدرية النيلي والقميص الابيض. هسه اجه وكت اللبس الحلو، الفساتين والكوستمات. اجه الوكت الي البس ألوان، واكسسوارات، واخلي مكياج وعطر، وصبغ اظافر، والبس حذاء كعب يا ناس، لان عمري ما حبيت حذاء الرياضة. اجه الوكت الي اروح للدوام، بلا ما توگفلنه “المشرفة التربوية”، اتدور منو خلت عطر، ومنو لبست تراچي. مكينة الخياطة مالتي ماطورها احترگ، اشو من چنت اخيط طلعت منه ريحة عطاب… عفت المكينة تبرد، وره ساعتين شغلت أشو المكينة فد مرة خنست، وردت اكمل الفستان مالتي، لان ثاني يوم چان عيد ميلاد ولد ويانه بالصف چنت معجبة بي، وردت أكون مميزة بنظره.
زين شلون…؟
رحت لخياط بالاعظمية گالي على باچر، ورجعت لمنطقتنا بالوزيرية بشارع الزهاوي أكو خياطة اسمها “شفيقة”، گلتلها بس كمليه دگيه مكينه، ما قبلت:
_ زين بس ارخصيلي اكمل خياطة بمكينتچ؟
ما قبلت…
صخونة…وصخائن.
رحت لسوگ الكسرة، سألت اقدم محل مال بقالة(أم سعيد)دلتني على “خالدة” ورحتلها. ذاك الاستقبال الحلو، والچاي وكعك، هيه اتخيط ابيتهم ما عدها محل، مخصصة غرفة الخطار، هية تخيط بزاوية، واختها تحف بزاوية ثانية.
خالدة كملت الفستان وكوته الي، وما قبلت تأخذ فلس، وگالتلي:
_عيب علوية، هاي أول طبتچ علينه.
كل ما أگول لأبوية:
_ يابه فدوة بدلي الماطور.
يگول:
_دورت الچ ماكو, ووصيت، الله كريم.
چانت ايام الحصار الاقتصادي على العراق بصعوبة نلگة بديل للحاجة مالت البيت.
آني الظهر ما انام. أكمل شغل البيت، وراها لو شويه اقره، لو ارسم، لو افصل على “مجلة بوردا” اطلع باترونات قياس 42 لان جنت ضعيفة بوكتها، واروح يم خالدة ، اتدوكهن مكينة.
خالدة موليد 1961, اكبر مني ب 12 سنة ، امراة ضخمة القامة، جمالها بسيط ومندثر. وطول فترة معرفتي بيها لابسه ربطة ومعصبه، حتى بالعيد ما تذب العصابة من راسها.’واهلها ما عدهم احد كمل دراسة، 3بنات وحدة حفافه، ووحدة خياطة، واللوخ تخبز وتزوجت. الولد تلاثتهم عمالة. الاب متوفي، والام والبيبي، مسؤولات من قبل خالدة. خالدة تخيط، وتسوي بهاي السلف، صلوات عالنبي بنت بفلوسها طابقين لاخوتها الزلم، وجهزتهم وزوجتهم، وآني حتى من تصلحت مكينتي، ظليت أمرلها كل فترة.
اني بيه طبع، ما أگطع بالطيبين، مرة رحتلها چانت حيل مقهوره، غاديه دم لان تركت الخياطه بعد ضعف العصب البصري، وبعد متگدر تستقبل احد حتى لو زيارة بسيطة بسبب الچناين، الي خلاهن الزمن يحكمن على ام البيت.
مهنة الخياطة هية الچانت رابطتها بالحياة والناس وقصصهم. اكثر اليخيطن چانن يگعدن يمها، اعتيادي كل وحدة تحچي تفاصيل حياتها الى أن يكمل فستانها وينكوي، والمرح والحكمة الي تقدمها لزبوناتها ما تنوصف. بالضبط چانت خالدة عبارة عن: عيادة استشفاء نفسي وبث للطاقة الايجابية، بحكمتها، ومرحها، وعقليتها الفذة المبهرة، رغم المرة ما مكملة ابتدائية، وما تطلع من البيت، حدها للسوگ تشتري لوازم خياطة او لزيارة الائمة عليهم السلام.
خالدة امرية بغدادية، انطت شبابها لعائلتها، وظلت بلا زواج، وتربي أولاد أخوتها الجاحدين، الي دائما يعوفون أختهم بلا محد يخلي بيدها فلوس دواها، لو يذكرها بچيس حنة لو دشداشة. اصلا روحتها لزيارة الأمام بالشافعات والتواسيل.
حتى من چنت اروحلها، واشوف وجوه الچناين ثكيله، بالعناد ما أضوج. حتى من شلنا من الوزيرية، لازم بالسنة فرد اربع خمس مرات ازور هاي الايقونة العراقية، وافرحها بأخباري، واشوفها صور سفراتي، وابعثلها فديوات قصائدي.
دائما العن كل اخ ما يجازي اخته السباعية الوفية الچادودة، وما يگدر يشوف بعطاءها اي ميزة، وما يرد الها جميل عن وگفتها وياه وتربيتها لاطفاله.
وألعن كل أخ يعير أخته بعدم زواجها لو مرضها لو زيادة وزنها.
كأنما بس من چان عدها فلوس وترش عليهم يحبوها..
خالدة مادرت بروحها اذا كبرت راح يصيرون هذولة الاخوة همه والزمن عليها.
30 نيسان
