خِيَّالِ الْهَوَا

عَنْ جَدْ صَعْبِه كْتِيرْ نِتْلَاقَى سَوَا

إِنْتِ اللِّي فِيِّي بَسّ إِنْتِي مِشْ مَعِي

مِتْلِ النَّبَضْ بِالْقَلِبْ: فِيكِي تِسْمَعِي،

أَمّا تَ فِيكِي تِقْشَعِي… مَا فِي نَوَا…

مِتْلِ اللِّي فِتِّي بْشِي حِلِمْ

تَا تُهُرْبِي وْقِلِّكْ تَعِي

وَكِلْمَا تِجِي تَا تِرْجَعِي

يْهِزِّ الْحِلِمْ عَا دَعِسْتِكْ…

أُوعَا

وْتُطْلَعْ رَجِعْتِكْ

دَعْسِةْ وَهِمْ…

مِتْلِ الْأَمِيرَه الْهَرْهَرُو دْمُوعَا

عَ شِبَّاكِ الْعَتِمْ

وَحْدَا وْلَا حَارِسْ قَاشِعَا…

مِتْلِ اللِّي غِفْيِتْ عَا تَخِتْ جُوعَا

وْ عَ رِكَّايِةْ ظُلِمْ

أَنْجَأِ النَّطْرَه تْ شَبِّعَا…

مِتْلِ اللِّي خِلْقو عَ الِحْفَافِي بْلَا إِسِمْ…

مِتْلِ اللِّي مَاتُو عَ السَّكِتْ بَدُّنْ دَوَا…

عَنْ جَدْ صَعْبِه كْتِيرْ نِتْلاقَى سَوَا..

تِخْمينْ كِنْتِ بْشِي طَقِسْ خِتْيَارْ

وَقْتِ لْ حِمِلْنِي وْطَارْ

خِيَّالِ الْهَوَا؟؟؟