زينة شعاع

قالوا الموسيقى غَنْجِة الأفكار
وباقِةْ نَغَم بِتْدَوْزِن الأشعار
لولا بْهَواك تْخَمَّر التّنهيد
وتْدَنْدَن بْإيقاع لَحن جديد،
صوتَك نَغَم أعذَب من الأوتار
اْعزِفْني صَدَى نَغمات صَيفِيِّه
دابُوا عا وَهْج الحُبّ عَيْنَييِ
شَعّل بِروحي العِشق تا غَنّي
وخَبّي حِلم هِربان عالجَنِّه
ولَوِّن هَوَى السّهرات لَيْلِيِّه
رَقِّص قلب عالوَلدَنِه بِيْمِيل
خَلّي صِبا الأشواق مِنّي يْسِيل
شو تْمايَلِت عالسّلُّم النّوتات
وتْنهَّدِت من حُبّك النايات
شو تْرَندَحِت بِعيونَك مْواوِيل
بْتِتصَوّر الدّنيي بَلا ألْحان
لولا شي مَرّة تْخَربَط الدُّوزان؟
وتْلَخبَطوا النّوتات هَوْن وهَوْن
وتْفَرفَطوا النّغمات وِسع الكَوْن
بْيِبقى الوَقت مَغمور بالأحزان
ولَحن الفرح غِرقان بالطوفان
صَمت ومَلل من دون طَعم ولَون

• يل نايم بعدك… لا تنام -مي سمعان
• صِرْتِي مَرَا عَ السَّكِتْ
• خِيَّالِ الْهَوَا
• آخر ثَانْيه بِ العمر
• لمّا يعتَقْ لون الحب

غرفة 19